Nike компанияси УЕФА билан еврокубок турнирлари учун тўплар етказиб бериш бўйича қиймати 40 миллион еврога тенг шартнома имзолайди. Бу ҳақда Financial Times нашри хабар бермоқда.
Манбанинг маълумотларига кўра, Американинг Nike фирмаси Чемпионлар лигаси учун тўп етказиб берувчи сифатида Германиянинг Adidas компанияси ўрнини эгаллайди. Аввалроқ, 1998 йилдан 2001 йилгача мазкур турнирда Америка фирмасининг тўпларидан фойдаланилган, шундан сўнг шартнома немис ишлаб чиқарувчисига ўтган эди.
Adidas компаниясининг Чемпионлар лигаси учун тўплар етказиб бериш бўйича амалдаги шартномаси 2026/2027 йилги мавсум якунигача мўлжалланган. Шунингдек, Европа лигаси ва Конференциялар лигаси учун тўп етказиб берадиган Decathlon компанияси билан тузилган шартнома ҳам ўша вақтда тугайди. Кутилишича, Nike 2031 йилнинг ёзигача мўлжалланган келишув доирасида бир йўла учта еврокубок турнирининг таъминотчисига айланади. Германия фирмаси эса бошқа турнирларга эътибор қаратишга қарор қилиб, шартномани узайтириш бўйича музокараларда иштирок этмаётганини тасдиқлади.
