«Ливерпуль» қанот ҳимоячиси Эндрю Робертсон «қизиллар» раҳбарияти унга ҳамкорликни узайтириш бўйича таклиф билан чиқмаганини маълум қилди.
«Мен янги келишувни рад этганим йўқ. Менга шартномани узайтириш таклиф ҳам қилинмади. Бизда шунчаки бу мавзуда суҳбат бўлди, холос. Ўтган мавсумдаёқ жамоа билан хайрлашишга яқин эдим, лекин қолишга қарор қилгандим. Январь ойида ҳам худди шундай вазият такрорланди», — дея шотландиялик ҳимоячининг сўзларини келтирмоқда Sky Sports.
Аввалроқ, Эндрю 2025/2026 йилги мавсум якунида мерсисайдликлар сафини тарк этиши маълум бўлган эди.
Робертсон «Ливерпуль» шарафини 2017 йилдан бери ҳимоя қилиб келмоқда. У умумий ҳисобда жамоа учун 373 та ўйинда майдонга тушиб, 13 та гол урди ва 69 та голли узатмани амалга оширди.













