«Ливерпуль»нинг нидерландиялик ҳимоячиси Виржил ван Дейк УЕФА Чемпионлар Лигаси чорак финали доирасида Франциянинг «ПСЖ» клубига қарши бўлиб ўтадиган жавоб учрашуви олдидан ўз фикрлари билан ўртоқлашди.

«Жавоб учрашувини интизорлик билан кутяпман. Олдимизда жуда мураккаб вазифа турганини биламиз, лекин айнан мана шундай ўйинлар учун биз майдонга тушамиз. Кейинги босқичга чиқиш учун фавқулодда (ўзига хос) бир нарса кўрсатишимиз керак. Ушбу имкониятга эга бўлиш учун юқори даражадаги маҳорат намойиш этишимиз шарт», — дея футболчининг сўзларини келтирмоқда мерсисайдликлар матбуот хизмати.

Эслатиб ўтамиз, биринчи ўйинда «Ливерпуль» сафарда 0:2 ҳисобида имкониятни бой берган эди. Жавоб учрашуви бугун, 14 апрель куни «Энфилд» стадионида бўлиб ўтади. Ўйин Тошкент вақти билан тунги соат 00:00 да (15 апрелга ўтар кечаси) бошланади.