«Лион» бош мураббийи лавозимида фаолият юритаётган Паулу Фонсека марказий ҳужумчи Эндрик шаънига айтган танқидлари борасида тўхталиб ўтди.

Яқинда мутахассис «Анже»га қарши ўйинда бразилиялик форварднинг кўрсатган ўйинидан қониқмаганини маълум қилган эди.

«Мураббий футболчиларда реакция уйғотиш учун маълум бир стратегия топиши керак — мен айнан шундай йўл тутдим. Мен бу гапларни унда реакция уйғотиш учун айтгандим ва бунинг натижасини кўрдим. Биз гаплашиб олдик. Эндрик — ёш футболчи, унинг характери менга жуда ёқади», — дея мураббийнинг сўзларидан иқтибос келтиради Goal нашри.

Эндрик «Лион» сафида ижара асосида тўп сурмоқда — мавсум якунлангач, у Мадриднинг «Реал» клубига қайтади. Франция клуби таркибида 19 ёшли футболчи 16 та ўйинда майдонга тушиб, 6 та гол ва 6 та голли узатмани амалга оширди.