«Ювентус»нинг полшалик ҳужумчиси Аркадиуш Милик навбатдаги жароҳатини олди. Бу ҳақда жамоа матбуот хизмати баёнот берди.

Нохуш воқеа 14 апрель куни бўлиб ўтган машғулот пайтида юз берган. Шифокорлар футболчининг ўнг оёқ сон қисмидаги икки бошли мушак чўзилганини аниқлашган. «Тикланиш учун аниқ муддатларни белгилаш мақсадида тахминан 10 кундан кейин қўшимча кўриклар ўтказиш режалаштирилган», — дейилади клуб баёнотида.

32 ёшли ҳужумчи деярли 2 йилдан бери сурункали жароҳатлар билан курашмоқда, бу эса унга тўлиқ куч билан ўйнашга халақит бермоқда. Ушбу мавсумда у бор-йўғи 2 та ўйинда майдонга тушиб, жами 34 дақиқа ҳаракат қилган, холос. Дастлабки маълумотларга кўра, Милик 4–5 ҳафтани ўтказиб юборади.