«Интер» раҳбарияти Кристиан Кивунинг ишидан мамнун ва ҳатто у билан шартномани узайтириши мумкин. «Нерадзурри» фақат бир ҳолатдагина бош мураббийни алмаштиришга тайёр — агар улар Диего Симеонени жамоага келишга кўндира олсалар.

Foot Mercato нашри хабарига кўра, Симеоненинг тайинланиши «Интер» учун ушалмас орзу бўлиб қолмоқда. Милан клуби раҳбариятининг баъзи вакиллари бу имкониятни муҳокама қилиш учун аллақачон аргентиналик мутахассис билан боғланишган.

Диего Симеоне 2011 йил декабрь ойидан бери «Атлетико Мадрид»ни бошқариб келмоқда. Эътиборлиси, у 1997–1999 йилларда «Интер» сафида футболчи сифатида тўп сурган.

Ҳозирда «Интер» А Серияда энг яқин таъқибчисини 9 очкога ортда қолдирган ҳолда пешқадамлик қилмоқда.