«Ан-Наср» ўз майдонида Саудия Арабистони чемпионатининг 29-тури доирасида «Ал-Иттифоқ» жамоасини қабул қилди ва 1:0 ҳисобида ғалаба қозонди.
Учрашувдаги ягона гол муаллифи Кингсли Коман бўлди — у 31-дақиқада рақиб дарвозасини ишғол қилишга муваффақ бўлди.
Меҳмонлар таркибида ҳимоячи Жек Хендри ўйиннинг асосий вақтига қўшиб берилган дақиқаларда (90+4) тўғридан-тўғри қизил карточка олиб, майдондан четлатилди.
Мезбонларнинг португалиялик юлдузи Криштиану Роналду учрашувни асосий таркибда бошлади ва 89-дақиқада захирага олинди.
Шу тариқа, «Ан-Наср» барча турнирлардаги мағлубиятсиз сериясини 12 январдан бери давом эттирмоқда. Ҳозирда жамоа 76 очко билан Саудия Про-лигаси турнир жадвалида пешқадамлик қилмоқда. «Ал-Иттифоқ» эса 42 очко билан еттинчи ўринда бормоқда.
