«Ливерпуль»нинг собиқ сардори Стивен Жеррард жорий мавсумда 50 та гол чегарасига етган Харри Кейннинг кўрсаткичларидан ҳайратда. У ҳужумчининг ажойиб барқарорлигига қуйидагича изоҳ берди:
«Харри Кейн шаънига навбатдаги олқишлар қанчалик ўринли эканини билмайман-у, лекин бир мавсумда 50 та гол уриш — бу шунчаки феноменал натижа. Менимча, Кейн «Олтин тўп» ҳақида орзу қилишга тўла ҳақли. Ҳар ҳолда, у Мбаппе ва Винисиусни ортда қолдириб кетди. Харри ҳозир бу ҳақда ўйлаб, юзида табассум билан юрганига ишончим комил», — дея Жеррарднинг сўзларини BBC Sport нашри келтирмоқда.
Эслатиб ўтамиз, инглизлик тўпурар 2023 йилдан бери Мюнхеннинг «Бавария» клуби шарафини ҳимоя қилиб келмоқда. У кеча «Реал»га қарши кечган драматик баҳсда (4:3) ҳам ўз ҳисобига гол ёздириб қўйиб, жамоасининг ярим финалга чиқишига катта ҳисса қўшди.
