«Бавария»нинг инглизлик ҳужумчиси Харри Кейн Мадриднинг «Реал» клубига қарши баҳсда гол урди ва бу гол у учун мавсумдаги юбилей — 50-гол бўлди.
Маълум бўлишича, Кейн Европанинг кучли бешлик чемпионатларида тўп тепадиган футболчилар ичида Эрлинг Холанддан кейин бир мавсумда 50 та гол урган биринчи ўйинчига айланди. Холанд бу натижани 2022/2023 йилги мавсумда (норвегияликнинг «Манчестер Сити»даги биринчи, Кейннинг эса «Тоттенхэм»даги охирги мавсумида) қайд этган эди.
Эслатиб ўтамиз, Чемпионлар Лигаси ярим финалида «Бавария» мусобақанинг амалдаги ғолиби — «ПСЖ» билан тўқнаш келади.
