Англия ва Россия терма жамоалари собиқ бош мураббийи Фабио Капелло «Наполи» устози Антонио Контенинг Италия терма жамоасига қайтиши мумкинлиги ҳақида фикр билдирди.
«Агар Конте Италия терма жамоасига қайтса, ҳозирги вазият ўн йил аввалгидан анча фарқ қилса-да, у нималарни тўғирлаш кераклигини аллақачон билади», — деди Капелло Gazzetta dello Sport нашрига берган интервьюсида.
Эслатиб ўтамиз, Антонио Конте 2014 йилдан 2016 йилгача Италия терма жамоасини бошқарган. Унинг қўл остида миллий жамоа Евро-2016 саралашидан муваффақиятли ўтиб, турнирнинг чорак финалигача етиб борган ва у ерда пенальтилар сериясида Германияга имкониятни бой берган эди. Конте «Наполи»ни 2024 йилдан бери бошқариб келмоқда ва ўтган мавсумда неаполликларни А Серия ғолиблигига олиб чиқди.
