Нью-Жерси губернатори Майки Шеррилл ФИФАдан ЖЧ-2026 вақтида мухлисларнинг транспорт харажатларини қоплашни талаб қилди.
Аввалроқ The Athletic нашри Нью-Жерсининг энг йирик транспорт компанияси — NJ Transit жаҳон чемпионати вақтида Нью-Йоркнинг Пенсильвания вокзалидан «Метлайф Стэдиум» стадионигача бўлган бориш ва қайтиш чипталари нархини 100 долларгача кўтаришни режалаштираётгани ҳақида хабар берган эди. Ваҳоланки, бундай чипталарнинг одатий нархи 12,9 долларни ташкил этади. Бундан ташқари, ЖЧ-2026 пайтида фуқароларнинг алоҳида тоифалари, жумладан, болалар, кексалар ва имконияти чекланган йўловчилар учун имтиёзлар бекор қилинади.
«Биз ФИФА жаҳон чемпионатидаги транспорт харажатлари учун бир доллар ҳам ажратмайдиган келишувни мерос қилиб олдик. NJ Transit мухлисларни ўйинларга хавфсиз етказиб қўйиш ва қайтариб олиб келиш учун 48 миллион доллар сарфлаши керак бўлган бир пайтда, ФИФА 11 миллиард доллар фойда кўради.
Мен Нью-Жерси аҳолисини бу харажатларни яна узоқ йиллар давомида тўлашга мажбур қилмоқчи эмасман. Транспорт харажатларини ФИФА тўлаши керак. Агар улар буни қилмаса, мен Нью-Жерсининг тўлашига йўл қўймайман», – деб ёзди Шеррилл ўзининг Twitter (X) саҳифасида.
