Собиқ ҳакам, «Алё, рэф!» машҳур телеграм-канали муаллифи Анатолий Синяев Чемпионлар лигаси доирасидаги «Бавария» ва «Реал» ўртасидаги ўйинда Славко Винчич бошчилигидаги ҳакамлар бригадаси ишига баҳо берди.

Синяевнинг сўзларига кўра, Мюнхенда кечган баҳсда Винчич ва ВАР «Реал» томонидан урилган учта голдан иктасини инобатга олмасликлари керак эди.

«Гюлернинг голи «ноҳақ белгиланган жарима зарбаси»дан сўнг урилди. Браим Диас контакт излаганди, у ерда фолга яқин ҳолатнинг ўзи йўқ эди. Мбаппенинг голини эса ВАР аралашуви билан бекор қилиш лозим эди, чунки ҳужум фазасида қоида бузилганди. Рюдигер очиқчасига қоидани бузганди», — дея Синяевнинг сўзларини келтиради Betonmobile.

Шу билан бирга, Синяев ҳакам Эдуардо Камавингага иккинчи сариқ карточкани тўғри кўрсатганини таъкидлаб ўтди.

Эслатиб ўтамиз, «Бавария» ўз майдонида «Реал»ни 4:3 ҳисобида мағлуб этди. Икки ўйин натижасига кўра мюнхенликлар 6:4 ҳисобида зафар қучиб, ярим финалга йўл олишди.