«Арсенал» вингери Нони Мадуэке, катта эҳтимол билан, якшанба куни «Манчестер Сити»га қарши бўладиган баҳсга тайёр бўлади. Бу ҳақда журналист Саймон Коллинз хабар бермоқда.
Эслатиб ўтамиз, чоршанба куни Чемпионлар лигаси доирасида «Спортинг»га қарши кечган ўйинда (0:0) Мадуэке тўқнашувдан сўнг майдонни шифокорлар ёрдамида тарк этган эди.
Манбанинг ёзишича, «Арсенал»да Мадуэкенинг якшанба кунги «Манчестер Сити» билан ўйинга тайёр бўлиши имкониятларини оптимистик баҳолашмоқда. Дастлабки ташхис унинг жиддий жароҳат олмаганини, балки шунчаки сон қисмидан қаттиқ зарб егани оқибатларини ҳис қилаётганини кўрсатди.
Букайо Сака йўқлигида Мадуэке — Микель Артета учун ҳужумнинг ўнг қанотидаги асосий танлов бўлиб турибди.
