«Астон Вилла» ҳужумчиси Олли Уоткинс Бирмингем жамоаси сафидаги ўзининг 100-голига изоҳ берди. Футболчи Европа Лигаси 1/4 финали доирасидаги «Болонья»га қарши жавоб учрашувида рақиб дарвозасини ишғол этди.
У 16-дақиқада ҳисобни очди. Шундан сўнг инглизлар рақиб дарвозасига яна учта тўп киритиб, йирик ҳисобдаги ғалабани (4:0) қўлга киритдилар.
«Бу мен доим интилган натижа эди, шу боис эришган ютуғимдан жуда фахрланаман. Бу ўзига хос воқеа — мен буни шу ерда, оилам ва дўстларим кўз ўнггида амалга оширдим», — дея ҳужумчининг сўзларини келтиради УЕФА матбуот хизмати.
Қайд этиш жоизки, ушбу гол Уоткинс учун 2026 йилнинг январидан буён биринчиси бўлди. Турнир ярим финалида «Астон Вилла» «Ноттингем Форест» билан тўқнаш келади.
