Ярим ҳимоячи Орельен Тчуамени Мадриднинг «Реал» клубида ўйнашнинг ўзига хос хусусиятлари ҳақида гапирди. Француз футболчиси 2022 йилнинг ёзида «Монако»дан 80 миллион евро эвазига «қаймоқранглилар» сафига келиб қўшилган эди.
«Бир-икки йил олдин мени ёмон ўйинчи деб ҳисоблашарди, стадионда ҳуштаклар билан кутиб олишарди. Мен қийинчиликларни бошдан кечирдим, лекин бу мени руҳий жиҳатдан анча кучайтиргани аниқ. Нима қилсам ҳам, барибир мен ҳақимда гапиришларини тушуниб етдим, шунинг учун бунга эътибор бермасликка ҳаракат қиламан. «Реал»да босим даражаси жуда юқори. Сен ё бу босим остида синасан, ёки ҳаммасини ўз назоратингга олиб, яхши ўйин билан жавоб қайтарасан», — дея Madrid Zone Тчуаменининг сўзларини келтиради.
26 ёшли хавбек яқинда бўлиб ўтган Чемпионлар лигаси 1/4 финали доирасидаги «Бавария»га қарши жавоб учрашувини дисквалификация сабабли ўтказиб юборган эди.
