«Милан» бош мураббийи Массимилиано Аллегри ёзда клубни тарк этиши мумкинлиги ҳақидаги хабарларга муносабат билдирди.
Аввалроқ италиялик мутахассиснинг клуб раҳбарияти билан муносабатлари таранг экани ва у мавсум давомида қўллаб-қувватловни сезмагани ҳақида маълум қилинган эди.
— Қоламанми? Бу ҳақда доим гапиришади. Лекин энг муҳими — натижалар. Менинг фаолиятим ўзи ҳақида гапиради. Мен ишлашни ва тараққиётни кўришни яхши кўраман. Ривожланиш учун камчиликлар устида ишлашимиз керак. Биз икки йил ичида Чемпионлар лигасини юта олмаймиз, лекин амбиция бўлиши шарт. Агар келажак ҳақида ўйламасанг, орқада қоласан.
Мен раҳбарият билан кўп мулоқот қиламан, аммо аввал мақсадларни белгилаб олиш керак. Трансфер бозорида мен йўналиш бераман, қолганини клуб ҳал қилади. Ҳозир бу ҳақда гапиришнинг маъноси йўқ. Раҳбарият билан кейинги учрашув? 12 июль, — деди Аллегри.













