«Барселона» ҳуқуқлари «Ал-Ҳилол»га тегишли бўлган ҳимоячи Жоау Канселуни ўз таркибида сақлаб қолмоқчи. Журналист Ферран Мартинеснинг хабарига кўра, португалиялик футболчини сотиб олиш имконияти (опцияси) 15 миллион еврони ташкил этади, бироқ Каталония клуби ўйинчини текинга қўлга киритишни ёки яна бир мавсумга ижарага олишни афзал кўрмоқда.
Ўз навбатида, «Ал-Ҳилол» киритган инвестицияларининг бир қисмини қайтариб олмоқчи ва келишувга Марк Касадони қўшишга тайёр бўлиши мумкин. Жоау Канселу 2024 йилда «Манчестер Сити»дан «Ал-Ҳилол»га 25 миллион евро эвазига ўтган эди. Унинг шартномаси 2027 йилнинг 30 июнигача мўлжалланган.
Жорий мавсумда ҳимоячи «Барселона» сафида барча турнирларда 16 та ўйинда майдонга тушиб, битта гол урди ва тўртта голли узатмани амалга оширди.
