Лондоннинг «Челси» ва «Тоттенхэм» клублари Премьер-лиганинг сўнгги учрашувларида даҳшатли натижаларни қайд этмоқда. Шанба куни пойтахтнинг ҳар икки жамоаси яна ғалаба қозона олмади: «Челси» ўз майдонида «Манчестер Юнайтед»га имкониятни бой берди (0:1), «Тоттенхэм» эса бироз аввалроқ «Брайтон» билан дуранг ўйнади (2:2).

«Шпорлар» чемпионатнинг охирги саккиз турида ҳаммадан ёмон натижа кўрсатмоқда — бор-йўғи икки очко жамғарилган. Иккинчи энг ёмон кўрсаткич эса «кўклар»га тегишли — улар худди шу даврда беш очко тўплашган (битта кам ўйин ўтказган «Бёрнли»да ҳам шунча очко).

Умумий турнир жадвалида «Тоттенхэм» 31 очко билан 18-ўринда бормоқда — бу Чемпионшипга тушиб кетиш ҳудудидир. «Челси» эса 48 очко билан олтинчи поғонани эгаллаб турибди.