Londonning «Chelsi» va «Tottenxem» klublari Premyer-liganing so‘nggi uchrashuvlarida dahshatli natijalarni qayd etmoqda. Shanba kuni poytaxtning har ikki jamoasi yana g‘alaba qozona olmadi: «Chelsi» o‘z maydonida «Manchester Yunayted»ga imkoniyatni boy berdi (0:1), «Tottenxem» esa biroz avvalroq «Brayton» bilan durang o‘ynadi (2:2).

«Shporlar» chempionatning oxirgi sakkiz turida hammadan yomon natija ko‘rsatmoqda — bor-yo‘g‘i ikki ochko jamg‘arilgan. Ikkinchi eng yomon ko‘rsatkich esa «ko‘klar»ga tegishli — ular xuddi shu davrda besh ochko to‘plashgan (bitta kam o‘yin o‘tkazgan «Byornli»da ham shuncha ochko).

Umumiy turnir jadvalida «Tottenxem» 31 ochko bilan 18-o‘rinda bormoqda — bu Chempionshipga tushib ketish hududidir. «Chelsi» esa 48 ochko bilan oltinchi pog‘onani egallab turibdi.