«Ланс» клубига ўтганидан сўнг ўз фаолиятини қайта тиклаган 27 ёшли франциялик ҳимоячи Маланг Сарр АПЛга қайтиши мумкин. Бу ҳақда Foot Mercato нашри хабар бермоқда.
Саррнинг «Челси» билан шартномаси (у ерда футболчи асосий таркибдан четлатилган эди) 2024 йилнинг ёзида бекор қилинганди. У «Ланс» сафига бориб қўшилди ва ротацияда ўтказилган бир мавсумдан сўнг, жамоанинг асосий ва муҳим ўйинчисига айланди. Унинг амалдаги шартномаси шу йилнинг ёзида якунига етади.
Шартномада муддатни автоматик равишда яна бир йилга узайтириш банди бўлса-да, Саррни жамоада олиб қолиш қийин кечади, деб қайд этади манба. Футболчига АПЛнинг бир нечта «катта» клублари, шунингдек, Саудия Арабистони жамоалари қизиқиш билдирмоқда. Ҳимоячи ўз келажаги ҳақида бош қотирмоқда, «Ланс» эса уни қолишга кўндиришга уринмоқда.
