"Манчестер Юнайтед" ҳужумчи Маркус Рэшфорднинг "Барселона"га қайта ижарага берилишини, шунингдек, товон пули сифатида белгиланган 30 миллион евролик трансфер нархини камайтиришни рад этади, чунки 28 ёшли вингернинг ҳақиқий бозор қиймати тахминан 40 миллион еврони ташкил қилади. Бу ҳақда Sport.es хабар бермоқда.

Бироқ, манбанинг маълумотига кўра, "блауграна" учун Рэшфордни сотиб олиш йўлидаги асосий тўсиқ унинг маоши бўлиб қолмоқда. "Қизил иблислар"нинг келаси мавсум учун Чемпионлар лигасига йўлланма олиш эҳтимоли юқорилиги сабабли, ҳужумчининг маоши ҳафтасига 325 минг фунтга (373 минг евро) ёки йилига тахминан 20 миллион еврогача кўтарилади. Ушбу маош миқдори футболчининг трансфер нархи билан қўшилганда, унинг "Барселона"да қолиш имкониятларини камайтиради.

Жорий мавсумда Рэшфорд барча турнирларда 43 та ўйинда иштирок этиб, 12 та гол ва 13 та голли узатмани амалга оширди.