«Сантос» мухлислари Бразилия чемпионати доирасида «Флуминенсе»га қарши кечган ўйинда Неймарнинг кўрсатган ўйинидан норози бўлишди. «Оқ-қоралар»нинг ўз майдонида ўтган учрашуви 2:3 ҳисобидаги мағлубият билан якунланди.
Юлдуз ҳужумчи баҳсни асосий таркибда бошлади ва ўйин охиригача майдонда ҳаракат қилди, бироқ самарали ҳаракатлари билан ажралиб тура олмади. The Touchline нашри хабарига кўра, учрашув якунлангач, маҳаллий мухлислар Неймарни ҳуштаклар билан кузатиб қўйишди. 34 ёшли футболчи майдонни тарк этаётиб, намойишкорона тарзда қулоқларини ёпиб олди.
Айни дамда «Сантос» Бразилия А Серия турнир жадвалида 12 турдан сўнг 13 очко билан 15-ўринни эгаллаб турибди. Неймар лиганинг олтита ўйинида ўз ҳисобига учта гол ва иккита голли узатмани ёздириб қўйган.
