Кеча Туркия Суперлигасининг 33-тури доирасида «Трабзонспор» ҳамда «Истанбул Башакшехир» жамоалари ўртасидаги учрашув бўлиб ўтди. Мазкур баҳс 1:1 ҳисобидаги дуранг билан якунланди.
Эътиборли жиҳати, меҳмонлар таркибида икки нафар ҳамюртимиз иштирок этди. Терма жамоамиз ҳужумчиси Элдор Шомуродов ўйинни асосий таркибда бошлаб, 75-дақиқага қадар майдонда фаол ҳаракат қилди. Шунингдек, жароҳатидан фориғ бўлган ярим ҳимоячи Аббос Файзуллаев ҳам сафга қайтди. У учрашувнинг 81-дақиқасида захирадан майдонга тушди.
Бироқ, Файзуллаев ўйиннинг 87-дақиқасида ҳакам томонидан сариқ карточка билан жазоланди. Бу унинг учун мавсумдаги навбатдаги огоҳлантириш бўлгани сабабли, ярим ҳимоячи сариқ карточкалари йиғилиб қолгани боис жамоасининг кейинги учрашувини ўтказиб юборишга мажбур бўлади.
Беллашув якунларига кўра, нуфузли Sofascore портали футболчиларнинг ҳаракатларини баҳолади. Унга кўра, Элдор Шомуродовнинг ўйини 6,7 баллга, Аббос Файзуллаевнинг иштироки эса 6,4 баллга лойиқ кўрилди.
