Мадриднинг «Реал» клуби собиқ яримҳимоячиси Луиш Фигу жамоанинг жорий мавсумдаги муваффақиятсиз иштироки борасида ўз фикрларини билдириб ўтди.

Маълумот ўрнида таъкидлаш жоизки, «қироллик клуби» айни пайтда Испания чемпионати турнир жадвалида «Барселона»дан 9 очкога ортда қолмоқда. Шунингдек, жамоа Европа Чемпионлар лигаси ва Испания кубоги баҳсларини тарк этган, Суперкубок финалида эса имкониятни бой берган. Жорий йилнинг январь ойида Хаби Алонсо истеъфога чиқарилиб, унинг ўрнига Алваро Арбелоа бош мураббий этиб тайинланган эди.

Луиш Фигу жамоадаги беқарорлик сабаблари ҳақида тўхталар экан, қуйидагиларни таъкидлади:

— «Реал»да мураббий алмашгани жамоа ўйинида беқарорликни юзага келтирди. Одатда одамлар айбдорни ташқаридан излашади, бироқ мен ички муҳитдан хабардор эмасман. Дунёнинг энг кучли клубларидан бири икки йил давомида бирорта ҳам соврин юта олмаса, бу жиддий сигнал ҳисобланади.

Шунингдек, собиқ футболчи Мадрид клубидаги босим ва талаблар юқорилигини қайд этди:

— Мадридда ҳамма нарса ғалабага асосланган, клуб зафарларга ўрганиб қолган. Бироқ футболда доим ҳам ғалаба қозонишнинг иложи йўқ, акс ҳолда ўйин зерикарли бўлиб қоларди. Бошқа амбицияси баланд жамоалар ҳам борлигини унутмаслик керак. Мадридда ҳар бир муваффақиятсизлик катта шов-шувга сабаб бўлади. Ишонаманки, футболчилар доим ғалабани истайди, мағлубият эса вазиятни янада қийинлаштиради, — деди Фигу.