«Хетафе» ҳимоячиси Диего Рико Ла Лига доирасидаги ўйинда (1:0) «Реал Мадрид» ҳимоячиси Антонио Рюдигер томонидан юзига тизза билан берилган зарбани ҳамон кечирмаганини маълум қилди.
2 март куни бўлиб ўтган Ла Лиганинг 26-туридаги баҳснинг эпизодларидан бирида, Рюдигер йиқилаётиб Риконинг елкасига, сўнгра иягига тиззаси билан зарба берган эди. «Хетафе» футболчиси юзини ушлаганча ерга йиқилган ва ўйин тўхтатилган. Ҳакам Алехандро Муньис майдонга шифокорларни таклиф қилган, бироқ қоида бузилишини қайд этмаган эди.
«У мени тирик қолдиргани учун ҳали ундан узр сўрашим ҳам керакми? Рюдигер — жуда агрессив ўйинчи, лекин ўша вазиятда у меъёрдан чиқиб кетди. Мен уни кечира олмайман», — деди Рико La Otra Grada подкастида.
