Италиянинг «Милан» клуби А Сериянинг жорий мавсумдаги энг ёрқин кашфиётларидан бири, «Лечче» ҳимоячиси Тиаго Габриэль билан қизиқмоқда. Таниқли инсайдер Николо Скиранинг хабар беришича, «россонерилар» вакиллари 21 ёшли футболчининг агентлари билан дастлабки музокараларни ўтказган.
Бразилиялик ёш ҳимоячи жорий мавсумда барча турнирларда 35 та ўйинда майдонга тушиб, нафақат ҳимоядаги ишончли ўйини, балки 2 та голи билан ҳам мутахассислар эътиборини тортди. «Лечче» ўз иқтидорини ёзда камида 30 миллион евро эвазига сотишни режалаштирмоқда.
Аввалроқ Англиянинг «Брентфорд» клуби футболчи учун 20 миллион евро таклиф қилган, бироқ италияликлар бу таклифни рад этишган эди. Шунингдек, Габриэль учун курашда «Ювентус» ва «Ноттингем Форест» клублари ҳам даъвогарлик қилмоқда. Эслатиб ўтамиз, футболчининг трансфер қиймати йил бошидан буён икки баробарга ўсган.
