Italiyaning «Milan» klubi A Seriyaning joriy mavsumdagi eng yorqin kashfiyotlaridan biri, «Lechche» himoyachisi Tiago Gabriel bilan qiziqmoqda. Taniqli insayder Nikolo Skiraning xabar berishicha, «rossonerilar» vakillari 21 yoshli futbolchining agentlari bilan dastlabki muzokaralarni o‘tkazgan.
Braziliyalik yosh himoyachi joriy mavsumda barcha turnirlarda 35 ta o‘yinda maydonga tushib, nafaqat himoyadagi ishonchli o‘yini, balki 2 ta goli bilan ham mutaxassislar e’tiborini tortdi. «Lechche» o‘z iqtidorini yozda kamida 30 million yevro evaziga sotishni rejalashtirmoqda.
Avvalroq Angliyaning «Brentford» klubi futbolchi uchun 20 million yevro taklif qilgan, biroq italiyaliklar bu taklifni rad etishgan edi. Shuningdek, Gabriel uchun kurashda «Yuventus» va «Nottingem Forest» klublari ham da’vogarlik qilmoqda. Eslatib o‘tamiz, futbolchining transfer qiymati yil boshidan buyon ikki barobarga o‘sgan.
