Лондоннинг «Челси» клуби собиқ футболчиси Флоран Малуда жамоанинг ёш юлдузи Эстевао атрофидаги муҳокамаларга ўз муносабатини билдирди. Малуданинг фикрича, ёш футболчини клуб афсонаси Эден Азар билан қиёслаш унинг ривожланишига салбий таъсир қилиши мумкин.
«Биз Эстеваони Азар билан солиштирмаслигимиз керак. Бу унга ёрдам бермайди. Азар — кўплаб совринлар соҳиби ва клуб тарихига улкан ҳисса қўшган афсонавий ўйинчи. Ҳозирги вазият ва контекст эса бутунлай бошқача», — деди Малуда.
Эслатиб ўтамиз, Эстевао 2025 йилда «Палмейрас»дан 47 миллион евро эвазига сотиб олинган эди. Жорий мавсумда 19 ёшли бразилиялик вингер «кўклар» сафида барча турнирларда 36 та ўйинда майдонга тушиб, 8 та гол ва 4 та голли узатмага муаллифлик қилди. Айни дамда Transfermarkt портали футболчини 80 миллион еврога баҳоламоқда.
