Londonning «Chelsi» klubi sobiq futbolchisi Floran Maluda jamoaning yosh yulduzi Estevao atrofidagi muhokamalarga o‘z munosabatini bildirdi. Maludaning fikricha, yosh futbolchini klub afsonasi Eden Azar bilan qiyoslash uning rivojlanishiga salbiy ta’sir qilishi mumkin.
«Biz Estevaoni Azar bilan solishtirmasligimiz kerak. Bu unga yordam bermaydi. Azar — ko‘plab sovrinlar sohibi va klub tarixiga ulkan hissa qo‘shgan afsonaviy o‘yinchi. Hozirgi vaziyat va kontekst esa butunlay boshqacha», — dedi Maluda.
Eslatib o‘tamiz, Estevao 2025 yilda «Palmeyras»dan 47 million yevro evaziga sotib olingan edi. Joriy mavsumda 19 yoshli braziliyalik vinger «ko‘klar» safida barcha turnirlarda 36 ta o‘yinda maydonga tushib, 8 ta gol va 4 ta golli uzatmaga mualliflik qildi. Ayni damda Transfermarkt portali futbolchini 80 million yevroga baholamoqda.
