Лондоннинг «Челси» клуби бош мураббийи Лиам Росеньорнинг келажаги жамоанинг омадсиз натижалари фонида сўроқ остида қолмоқда.
Football.london нашрининг хабар беришича, агар «аристократлар» раҳбарияти инглиз мутахассисини лавозимидан озод этишга қарор қилса, унга 24 миллион фунт стерлинг миқдорида товон пули тўлашига тўғри келади. Бундай катта маблағ мураббийнинг 2032 йилнинг 30 июнига қадар мўлжалланган узоқ муддатли шартномаси билан изоҳланмоқда.
Эслатиб ўтамиз, Лиам Росеньор жорий йилнинг январь ойида Энцо Мареска ўрнини эгаллаган эди. Бироқ унинг қўл остида жамоа инқирозга юз тутди — «кўклар» АПЛ доирасида қаторасига бешта ўйиндан бери мағлубиятга учрамоқда ва ушбу баҳсларнинг бирортасида рақиб дарвозасига йўл топа олишмади. Бу «Челси» учун сўнгги 114 йил ичидаги энг ёмон кўрсаткичдир.
Айни дамда «Челси» Англия чемпионати турнир жадвалида 48 очко билан еттинчи ўринни эгаллаб турибди.
