Ҳужумчи Ферран Торрес катта эҳтимол билан жорий мавсум якунланганидан кейин «Барселона»ни тарк этади.
The Athletic нашрининг маълумотларига кўра, Каталония клуби ҳужумчини сотишга қарор қилган ва футболчининг трансфери бўйича таклифларни кўриб чиқишга тайёр. Ферран билан янги шартнома бўйича музокаралар олиб борилмаяпти.
Ферран Торрес 2022 йилда «Манчестер Сити»дан «Барселона»га 55 миллион евро эвазига ўтган эди. Унинг «кўк-анорранглилар» билан амалдаги шартномаси 2027 йилнинг 30 июнига қадар мўлжалланган.
Жорий мавсумда ҳужумчи жамоа сафида барча турнирларда 44 та ўйинда майдонга тушиб, 19 та гол урди ва 2 та голли узатмани амалга оширди. Transfermarkt портали Торреснинг қийматини 50 миллион еврога баҳоламоқда.













