«Барселона» ярим ҳимоячиси Гави яқинлашиб келаётган «эл-класико» ҳақида фикр билдирди. Мазкур баҳсда чемпионлик унвони тақдирига узил-кесил нуқта қўйилиши мумкин.

Чемпионат финишига 6 тур қолганида «кўк-анорранглилар» «Реал»ни 9 очкога ортда қолдирмоқда. 10 май куни «Камп Ноу»да ўзаро учрашув бўлиб ўтади — катта эҳтимол билан ушбу ўйин якунлангач, каталонияликлар Ла Лига олтин медалларини нақд қилиб қўйишади. Шунга қарамай, Гави учун бу у қадар принципиал эмас.

«Биз чемпионликни айнан «Эл-Класико»да қўлга киритишни истаймизми? Йўқ, мен ҳам, бутун жамоамиз ҳам «Реал» билан ўйинни кутиб ўтирмасдан, унвонни вақтлироқ нақд қилишни хоҳлаймиз», — дея хавбекнинг сўзларини келтиради Madrid Zone.

Эслатиб ўтамиз, чоршанба куни Ханс-Дитер Флик жамоаси ўз майдонида «Сельта»ни мағлуб этди (1:0).