Миланнинг «Интер» клуби «Сассуоло»нинг 23 ёшли ҳимоячиси Тарик Муҳаремович трансфери бўйича ҳаракатларини давом эттирмоқда. Бу ҳақда La Gazzetta dello Sport нашри хабар бермоқда.

«Интер» аллақачон Муҳаремович билан маош ва бошқа шартнома мажбуриятлари бўйича келишувга эришган, бироқ «нерадзуррилар» ҳали трансфер нархи борасида «Сассуоло» билан келиша олганлари йўқ. «Сассуоло» босниялик футболчи учун 30 миллион евро миқдорида нарх белгилаган, аммо АПЛнинг бир нечта клублари ҳам унга қизиқиш билдираётгани сабабли бу сумма ортиши эҳтимоли бор.

Келишувдан тушадиган маблағнинг ярми «Ювентус»га тегади. Туринликлар бу бандни икки йил аввал футболчининг «Сассуоло»га ўтиши вақтида шартномага киритишган эди. Жорий мавсумда Мухаремович 28 та ўйинда иштирок этиб, 2 та гол урди, 2 та голли узатмани амалга оширди ва 6 та сариқ карточка олди.