«Ковентри» жамоасини 25 йиллик танаффусдан сўнг Англия Премьер-лигасига олиб чиққан Фрэнк Лэмпард фаолиятини яна собиқ клубида давом эттириши мумкин.
Британия матбуотининг хабар беришича, яқинда Лиам Росеньор билан хайрлашган «Челси» раҳбарияти янги мураббий сифатида айнан Лэмпард номзодини кўриб чиқмоқда. Мутахассиснинг «аристократлар» учун нақадар муҳим шахс экани инобатга олинса, бу тайинлов амалга ошиши эҳтимоли юқори баҳоланмоқда.
Маълумот учун, Лэмпард 2019-2021 йиллар давомида ҳам Лондон клубини бошқарган эди. Гарчи ўшандаги фаолияти юқори натижалар билан якунланмаган бўлса-да, «Ковентри»даги муваффақият унинг мураббий сифатида сезиларли даражада тажриба орттирганини кўрсатмоқда.
Ўз навбатида, «Ковентри» раҳбарияти мутахассисни жамоада сақлаб қолишга ҳаракат қиляпти. Клуб президенти Дуг Кинг мураббийнинг келажаги борасида шундай деди:
«Фрэнк бу ерда бахтли, унга шаҳар ёқади. Албатта, қандайдир фавқулодда кутилмаган таклиф бўлиши мумкин, лекин бу ҳақда ҳозирча изоҳ бера олмайман. У — ажойиб мураббий».
