«Барселона» бош мураббийи Ханс-Дитер Флик Ламин Ямалнинг жароҳати борасида ўз фикрларини билдирди. «Барселона» ва Испания терма жамоаси вингери «Сельта»га қарши ўйинда (1:0) соннинг орқа мушаклари йиртилиши сабабли мавсумнинг қолган қисмини ўтказиб юборади.

«Бу вазият биз учун ҳам, у учун ҳам осон эмас. У буни енгиб ўтишни ва ундан сабоқ чиқаришни ўрганиши керак. Бу унинг илк мушак жароҳати, аммо у жуда диққатли ва мотивацияга тўла. У Жаҳон чемпионатигача тикланишга улгуради ва янада кучли бўлиб қайтади.

У қўполликдан сўнг ноқулайлик сезди, гарчи ўша пайтда бу жиддий кўринмаган бўлса-да, у ўйинни давом эттиришга қарор қилди. Эҳтимол, кейинроқ вазият ёмонлашгандир, лекин ўз туйғуларига қулоқ солиш муҳим. Бу унинг илк мушак жароҳати ва бу ҳам ўрганиш жараёнининг бир қисмидир. У танаси бераётган сигналларни тушунишни ўрганиши лозим. Мавсум бошида ҳам у бир нечта ўйинни ўтказиб юборганди ва жамоа ўшанда вазиятдан яхши чиқиб кетганди», — деди Флик.