Италия А Серияси 2025/2026 йилги мавсумининг 34-туридан ўрин олган «Наполи» — «Кремонезе» учрашуви Неаполдаги «Диего Армандо Марадона» стадионида бўлиб ўтди. Баҳс мезбонларнинг 4:0 ҳисобидаги йирик ғалабаси билан якунланди.

Ўйиндаги илк голни 3-дақиқада «Наполи» ярим ҳимоячиси Скотт Мактоминей киритди. 45-дақиқада «Кремонезе» ҳимоячиси Филиппо Терраччано ўз дарвозасини ишғол қилди. Биринчи бўлим сўнггида, 45+3-дақиқада Кевин Де Брёйне ҳисобни йирик кўринишга олиб келди. Иккинчи бўлимда эса 52-дақиқада ҳужумчи Алиссон Сантос неаполликларнинг тўртинчи голини урди. 83-дақиқада Скотт Мактоминей пенальтини аниқ амалга ошира олмади.

«Кремонезе» Италия чемпионати турнир жадвалида 34 учрашувдан сўнг 28 очко билан 17-ўринни эгаллаб турибди. «Наполи» эса 69 очко билан иккинчи поғонада жойлашган.

Италия — А Серияси, 34-тур
24 апрель 2026 йил, жума
«Наполи» — «Кремонезе» 4:0
Голлар: Мактоминей, 3 (1:0), Терраччано, 45 (автогол, 2:0), Де Брёйне, 45+3 (3:0), Сантос, 52 (4:0).