«Тоттенхэм» клубининг собиқ футболчиси ва мураббийи Тим Шервуд «Челси»нинг ҳозирги бошқарув тизими ҳақида кескин фикр билдирди.

Шервуд Sky Sports телеканалига берган интервьюсида лондонликлар раҳбарияти футболни тушунмайдиган инсонлардан ташкил топганини таъкидлаган.

«Ички футбол жараёнларини футбол одамлари бошқаришига қўйиб беринг. «Челси»да бешта спорт директори бор, лекин уларнинг ҳеч бири илгари футбол ўйнамаган. Агар мен уй қурмоқчи бўлсам, илгари уй қурган одамни чақираман, уй қура оламан деб ўйлайдиган одамни эмас. «Челси» раҳбарияти компьютерда «футбол менежери» ўйинини ўйнаётганга ўхшайди», — дея таъкидлади мутахассис.

Эслатиб ўтамиз, Англия Премьер-лигасининг 34 туридан сўнг «Челси» 48 очко билан турнир жадвалининг 8-поғонасини эгаллаб турибди.