«Бавария»нинг чап қанот ҳимоячиси Рафаэл Геррейру Чемпионлар лигаси ярим финали доирасидаги «Пари Сен-Жермен»га қарши баҳсларда жамоасига ёрдам бера олмайди.
32 ёшли футболчи жароҳати сабаб сафдан чиққан ва парижликлар билан бўладиган ҳар икки учрашувни ўтказиб юборади. Бу ҳақда инсайдер Фабрицио Романо хабар бермоқда. Бундеслиганинг шанба куни «Майнц»га қарши кечган ўйинида жамоа устози Венсан Компани португалиялик футболчини 57-дақиқада захирага олишга мажбур бўлган эди.
«Бавария» ва "ПСЖ" ўртасидаги илк тўқнашув сешанба куни, 28 апрель (эртага) Парижда бўлиб ўтади. Жавоб ўйини эса 6 май куни Мюнхенда ўтказилади. Ушбу жуфтлик ғолиби финалда Лондоннинг «Арсенал» ёки Мадриднинг «Атлетико» жамоаларидан бири билан куч синашади. Маълумот учун, Рафаэл Геррейру жорий мавсумда 27 та ўйинда майдонга тушиб, 6 та гол ва 3 та голли узатмани ўз ҳисобига ёздириб қўйган эди.
