«Барселона» клуби дарвозабони Войцех Шесни ҳозирда «Интер Майами» шарафини ҳимоя қилаётган Лионель Мессини фаолиятидаги энг мураккаб рақиб деб ҳисоблашини очиқлади. Бу ҳақда таниқли инсайдер Фабрицио Романо хабар бермоқда.
Польшалик посбоннинг сўзларига кўра, Месси унга жуда кўп гол урмаган бўлса-да, майдондаги ҳаракатлари билан доимо катта хавф туғдирган.
«Мен тўқнаш келган энг қийин ҳужумчи — бу Лионель Месси. Балки менга ундан кўпроқ гол урган бошқа ҳужумчилар бўлгандир, чунки Лео дарвозамга бор-йўғи учта гол урган, холос. Бироқ у мен қўрққан ягона футболчи бўлиб қолмоқда. У ўта хавфли ўйинчи», — дея Шеснининг сўзларини келтиради манба.
Маълумот учун, 36 ёшли Войцех Шесни 2024 йилдан буён «Барселона» сафида ҳаракат қилмоқда. Жорий мавсумда польшалик дарвозабон барча турнирлар доирасида 10 та ўйинда майдонга тушиб, 17 та гол ўтказиб юборди.
