Мадриднинг «Реал» клуби 22 ёшли ҳужумчиси Гонсало Гарсияни 60 миллион евро эвазига сотишга тайёрлигини билдириши билан, футболчига даъвогарлар пайдо бўлди. AS нашрининг хабар беришича, Дортмунднинг «Боруссия» клуби футболчининг хизматларига жиддий қизиқиш билдирмоқда.

Дортмундликлар Гарсияни ўз сафига қўшиб олиш истагида бўлса-да, ҳозирча улар трансфер учун фақат 30 миллион евро таклиф қилишмоқда. Шу сабабли томонлар ўртасидаги музокаралар ҳозирча олдинга силжимаяпти.

Маълумот учун, Гонсало Гарсия мадридликларнинг асосий таркибида ўтган йили Клублар ўртасидаги жаҳон чемпионатида Килиан Мбаппени алмаштирган ҳолда дебют қилган эди. У ўша турнирнинг энг яхши тўпурарига айланган. Жорий мавсумда эса ҳужумчи «қироллик клуби» сафида 32 та ўйинда майдонга тушиб, 6 та гол ва 2 та голли узатмага муаллифлик қилди.