"Насаф" жамоасида бир ўйинчи борки, уни клуб мухлислари жон дилидан яхши кўришади. Бу 27-рақамда ўйнайдиган жонкуяр ярим ҳимоячимиз Илҳом Юнусовдир. Илҳом "Насаф" сафида энг кўп меҳнат қиладиган ўйинчилар сирасига киради. Унинг майдондаги чаққон ҳаракатлари барча мухлисларда олам-олам завқ ўйғотади.

Ўзларингизга маълум, "Насаф" ПФК раҳбарияти ва мухлислар клуби билан ҳамкорликда ўтган йили  янги тадбирга қўл уришган эдилар. Яъни, Қаршида бўлиб ўтадиган жамоанинг ҳар бир ўйинида ўзини кўрсатган ўйинчилар кейинги ўйинда мухлислар клуби томонидан эътироф этилиб, ушбу ўйинчига махсус ёрлиқ топширилади. Мавсум сўнгида эса ана шу ёрлиққа сазовор бўлган ўйинчилар қўшимча равишда клуб  томонидан рағбатлантирилади.

Хабарингиз бор, 22 август куни Қарши шаҳрида бўлиб ўтган Ўзбекистон Кубоги ярим финали жавоб учрашувида жамоамиз пойтахтнинг "Пахтакор" жамоасини 2:0 ҳисобида мағлубиятга учратиб, жорий йилдаги Ўзбекистон Кубоги финали йўлланмасини қўлга киритди.

Ушбу учрашувда стадионга йиғилган мухлислар жамоанинг барча ўйинчилари ўз маҳорати-ю кучларини аямасдан олдиларида турган вазифасини адо этиш учун, мухлисларни хурсанд қилиш учун майдонда жавлон уриб ўйнашди ва оқибатда меҳнатлари самара берди. "Насаф" кетма-кет учинчи марта Ўзбекистон Кубоги финалига чиқди.

"Насаф" ПФК мухлислар клуби аъзолари бир овоздан ана шу учрашувдаги "энг яхши ўйинчи" сифатида ярим ҳимоячи Илҳом Юнусовни эътироф этишди. 26 август куни "Сўғдиёна"га қарши учрашувнинг танаффус пайти унга клуб мухлислари етакчиси Ўктам Узоқов томонидан махсус ёрлиқ топширилди.

Албатта Илҳом Юнусов ана шу биргина ўйинда эмас, балки жамоанинг барча ўйинларида ҳам катта ҳажмда меҳнат қилади ва ўзининг жамоа ютуқларига муносиб ҳиссасини қўшиб келади. Шундан келиб чиқиб, у клуб мухлисларининг эътирофига ва олқишларига сазовор бўлмоқда. Илҳом Юнусов ўтган йилги мавсумда ҳам мухлислар томонидан энг яхши ўйинчи сифатида бир неча марта ана шундай тан олинган эди.

Биз "Насаф" жамоасининг барча мухлислари номидан севимли ва жонкуяр ўйинчимиз Илҳом Юнусовни ана шу ютуғи билан самимий олқишлаб қоламиз. Умид қиламизки, у жамоамиз сафида мана шундай мухлислар ҳурматига кўплаб сазовор бўлади.