Испаниялик собиқ ҳимоячи Абелардо ўзининг яқин дўсти ва «ПСЖ» бош мураббийи Луис Энрикенинг мақсадлари ҳамда эришган натижалари ҳақида фикр билдирди.

Абелардо ва Энрике ўз вақтида «Спортинг Хихон», «Барселона» ва Испания терма жамоасида бирга тўп суришган.

«Луис жуда амбицияли ва ҳеч қачон ғалабалардан чарчамайди. У футбол тарихида энг яхши бўлишни ва ўз меросини қолдиришни истайди. Унинг ҳисобида иккита ЕЧЛ кубоги бор (биринчисини «Барса» билан 2015 йилда қўлга киритган — таҳр.), лекин у бу мусобақада 4 ёки 5 марта зафар қучишга қодир. Бу у учун янги чақирув бўлиши мумкин», — деди Абелардо.

Шунингдек, собиқ футболчи «ПСЖ»нинг ўтган йилги тарихий ғалабасини алоҳида эътироф этди:

«У «ПСЖ»га илк ЕЧЛ кубогини олиб келди ва буни жуда таъсирли тарзда амалга оширди. Финалда «Интер»ни (5:0) тор-мор этишдан аввал Англиянинг учта гранди — «Ливерпуль», «Астон Вилла» ва «Арсенал»ни мусобақадан чиқариб юборди. Бу пенальтилар сериясидаги тасодифий ғалаба эмас, ҳақиқий доминантлик эди».