Мюнхеннинг «Бавария» клуби ҳимоячиси Дайо Упамекано Чемпионлар лигаси ярим финалидан ўрин олган «ПСЖ»га қарши дастлабки баҳс олдидан журналистлар билан суҳбатлашди. Немис ва француз клублари ўртасидаги учрашув 28 апрель куни бўлиб ўтади.
Усмон Дембеле билан бўлажак тўқнашув ҳақида
«Биз битта шаҳарданмиз. Чемпионлар лигаси ярим финалида ўзаро тўқнаш келишимиз — ақл бовар қилмас воқеа. Ҳа, биз илгари ҳам бир-биримизга қарши ўйнаганмиз, лекин бу сафар бошқача ўйин бўлади. Иккимиз ҳам ўз жамоамиз учун курашишга тайёрмиз», — дея Упамеканонинг сўзларини келтиради TNT Sports.
Жамоадоши Майкл Олисе ҳақида
«Машғулотларда унга қарши ҳимояланишимга тўғри келади ва бу жуда қийин. У деярли ҳамма нарсани қила олади. Тўп унда бўлганида, мени алдаб ўтишига ишонади. У жуда кўп меҳнат қилади ва доимо ўз устида ишлашни хоҳлайди. У билан бирга «Бавария»да ва терма жамоада ўйнаётганимдан хурсандман».
Рақиб ҳақида
«ПСЖ таркибида ажойиб ўйинчилар бор ва улар супержамоа. Ҳозирда улар дунёнинг энг яхши клубларидан бири. Улар жуда яхши шаклланган ва агрессив ҳужум қилишади. Биз илгари ҳам парижликларга қарши ўйнаганмиз. Бу жуда қийин. Улар майдонда доимий ҳаракат қилиш орқали рақибни мувозанатдан чиқаришга ҳаракат қилишади. Биз буни уддалашга ҳаракат қиламиз».
