Франция президенти Эммануэль Макрон Европа Чемпионлар лигаси ярим финалидан ўрин олган «ПСЖ» ва «Бавария» ўртасидаги баҳс олдидан ўз фикрлари билан ўртоқлашди. Давлат раҳбари гарчи ички чемпионатда бошқа жамоага хайрихоҳ бўлса-да, халқаро майдонда Париж клубини қўллаб-қувватлашини билдирди.
«Мен асли «Марсель» мухлисиман, аммо бугун Франция шарафини «ПСЖ» ҳимоя қилади. Шундай экан, мен «ПСЖ»га мухлислик қиламан! Тахминим? Менимча, «ПСЖ» 3:1 ҳисобида ғалаба қозонади», — дея Макроннинг сўзларини келтиради L’Équipe нашри.
Эслатиб ўтамиз, 2025/2026 йилги мавсум ярим финалининг илк учрашуви бугун, 28 апрель оқшомида Париждаги «Парк де Пренс» стадионида бўлиб ўтади. Жавоб ўйини эса 6 май куни Мюнхенда ўтказилади. Чорак финалда парижликлар «Ливерпуль»ни (умумий ҳисоб 4:0), мюнхенликлар эса Мадриднинг «Реал» клубини (6:4) мусобақадан чиқариб юборишган эди.
