Суперлиганинг 10-тури доирасида кечган «Андижон» — «Динамо» (2:1) учрашувидан сўнг самарқандликлар устози Вадим Абрамов мағлубият сабаблари ва жамоадаги ички муҳит ҳақида кутилмаган баёнотлар берди.

«Мағлубиятга ўз хатоларимиз сабаб»

Тажрибали мутахассис жамоасининг ўйин давомида ҳисобда олдинга чиқиб олиб, якунда имкониятни бой берганини руҳий ишончсизлик ва қўпол хатолар билан изоҳлади.

«Баҳсни кўпчилик кўрди, кичик ҳисобда мағлуб бўлдик. Бундай ҳолат биринчи марта кузатилаётгани йўқ. Ўз хатоларимиз туфайли гол ўтказиб юборяпмиз. Гол урдик, аммо кейин дарвозамиздан тўплар олиб чиқишга мажбур бўлдик. Ўзимиз ўйинни рақибга топшириб қўйдик. «Андижон» биздан кучли ўйнамади, лекин улар ғалаба қозонишди», — деди Абрамов.

Маошсизлик ва футболчиларнинг руҳий ҳолати

Матбуот анжуманида жамоадаги молиявий муаммолар ва футболчиларнинг майдондаги агрессив ҳаракатлари мавзуси ҳам четда қолмади. Айниқса, Анвар Ҳожимирзаевнинг қизил карточка олиши мураббий томонидан маошларнинг берилмаётгани билан боғланди.

«Ўйинчиларни тўғри тушунаман. Анчадан бери ойлик маош олмаган футболчида ҳар хил руҳий ҳолатлар юз беради. Муаммоларимиз етарлича. Кимдир кетмоқчи, яна кимдир бошқа фикрда. Бундай вазиятда уларни айблаш ҳам қийин», — дея таъкидлади мутахассис.

Таркибдаги йўқотишлар ва ФИФАга эҳтимолий даъволар

Жамоа етакчиларидан бири Хислат Халилов ва бразилиялик легионернинг клубни тарк этгани ҳақидаги хабарларга Абрамов ойдинлик киритди. Унинг сўзларига кўра, молиявий етишмовчилик клубни оғир аҳволга солиб қўйган.

«Улар келишди, кўришди ва ойлик берилмаётгани учун ўйнамайдиган бўлишди. Пулимиз бўлмаса, нима ҳам қила олардик? Легионер кетди ва менимча, ФИФАга мурожаат қилса керак. Хислат Халилов ҳам кетмоқчи эканини айтди, мен рози бўлдим. Хоҳламаган ўйинчини мажбурлаб ўйнатиб бўлмайди. Жамоада фақат ўзини эмас, бутун коллективни ўйлаш керак», — деди Вадим Абрамов.

Эслатиб ўтамиз, «Динамо» ушбу мағлубиятдан сўнг турнир жадвалида 15-ўринга тушиб кетди.