Мадриднинг «Атлетико» клуби ярим ҳимоячиси Коке Чемпионлар лигаси ярим финали доирасидаги Лондоннинг «Арсенал» жамоасига қарши ўйиндаги (1:1) ҳакамлик ишига тўхталди.

Баҳснинг асосий муҳокама мавзуларидан бири — учрашув сўнггида ҳакам Данни Маккелининг «матрасчилар» дарвозасига белгиланган пенальтини бекор қилиш ҳақидаги қарори бўлди. Таъкидлаш жоизки, ҳар икки гол ҳам ўн бир метрлик жарима зарбасидан киритилди.

«Ҳакам қўлидан келган барча ишни қилишга ҳаракат қилди. Агар биз зарба беришда ёки пас узатишда хато қилишимиз мумкин бўлса, демак, ҳакамларга ҳам хато қилишга рухсат берилган. Баҳсли қарорлар бўлди, лекин бунинг қўрқинчли жойи йўқ – барчамиз ўз ишимизни иложи борича энг яхши тарзда бажаришга ҳаракат қиламиз», – деди Коке ўйиндан сўнг журналистлар билан суҳбатда.

Учрашувда голларга 44 ва 56-дақиқаларда мос равишда Виктор Дьёкереш ҳамда Хулиан Альварес муаллифлик қилишди.