Madridning «Atletiko» klubi yarim himoyachisi Koke Chempionlar ligasi yarim finali doirasidagi Londonning «Arsenal» jamoasiga qarshi o‘yindagi (1:1) hakamlik ishiga to‘xtaldi.
Bahsning asosiy muhokama mavzularidan biri — uchrashuv so‘nggida hakam Danni Makkelining «matraschilar» darvozasiga belgilangan penaltini bekor qilish haqidagi qarori bo‘ldi. Ta’kidlash joizki, har ikki gol ham o‘n bir metrlik jarima zarbasidan kiritildi.
«Hakam qo‘lidan kelgan barcha ishni qilishga harakat qildi. Agar biz zarba berishda yoki pas uzatishda xato qilishimiz mumkin bo‘lsa, demak, hakamlarga ham xato qilishga ruxsat berilgan. Bahsli qarorlar bo‘ldi, lekin buning qo‘rqinchli joyi yo‘q – barchamiz o‘z ishimizni iloji boricha eng yaxshi tarzda bajarishga harakat qilamiz», – dedi Koke o‘yindan so‘ng jurnalistlar bilan suhbatda.
Uchrashuvda gollarga 44 va 56-daqiqalarda mos ravishda Viktor Dyokeresh hamda Xulian Alvares mualliflik qilishdi.
