Мадриднинг «Атлетико» клуби футболчиси Маркос Льоренте Чемпионлар лигаси биринчи ярим финали доирасида Лондоннинг «Арсенал» жамоаси билан қайд этилган дуранг (1:1) ҳақида фикр билдирди.

«Канонирлар» 44-дақиқада ҳисобни очишганди, бироқ бу устунлик узоқ давом этмади — 56-дақиқадаёқ Хулиан Альварес мувозанатни тиклади.

«Биринчи бўлимда «Арсенал» устунлик қилди, иккинчи бўлимда эса — биз. Жавоб ўйинида ҳам бугунги баҳснинг танаффусдан кейинги қисмида кўрсатган ўйинимизни давом эттиришимиз керак.

Тўпни қайтариб олиш биз учун қийин кечди, рақиб жарима майдони яқинида эса ҳаддан ташқари шошқалоқликка йўл қўйдик. Бу ўз таъсирини кўрсатмай қолмади: биз яратишимиз мумкин бўлган вазиятларнинг барчасини ҳам юзага келтира олмадик, борларидан эса унумли фойдалана олмадик», — деди Льоренте журналистлар билан суҳбатда.