«Манчестер Юнайтед» ярим ҳимоячиси Мэйсон Маунт жамоасининг келгуси мавсумдаги мақсадлари ва Англия Премьер-лигасидаги чемпионлик имкониятлари ҳақида тўхталиб ўтди.
«Мен аллақачон Чемпионлар лигасида ғолиб чиққанман, шунинг учун эндиги асосий мақсадим — АПЛда зафар қучиш. Биз буни уддалай оламизми? Ҳа, менимча, бунинг иложи бор.
Балки ҳозирча бу мақсад бироз узоқ туюлар, аммо жамоа сифатида бор кучимизни беришимиз учун мана шундай руҳиятга эга бўлишимиз керак. Биз аллақачон кучли жамоалар — «Манчестер Сити», «Ливерпуль», «Челси» ва «Арсенал»га қарши баҳсларда нималарга қодирлигимизни кўрсата олдик ва уларни мағлуб этдик», — дейди Маунт.
Футболчининг таъкидлашича, эндиги вазифа барқарорликни сақлаб қолиш ва юқори даражадаги ўйинларни тез-тез намойиш этишдан иборат.
«Энди бу натижаларни янада юқорироқ савияда — Чемпионлар лигасида такрорлашимиз ва АПЛда барқарорликка эришишимиз керак. Умид қиламанки, келгуси мавсумда бунда катта роль ўйнайман. Менинг мақсадим аниқ — АПЛ олтинига эга чиқишни истайман», — дея қўшимча қилди инглиз яримҳимоячиси.
