АҚШ терма жамоаси бош мураббийи Маурисио Почеттино «ПСЖ»да Месси, Неймар ва Мбаппе билан бирга ишлаган давридан олган таассуротлари билан ўртоқлашди.
«Менимча, айнан «ПСЖ»даги фаолиятимдан кейин мен тўлақонли мураббийга айландим. Ҳатто таркибингизда жуда кучли футболчилар бўлган тақдирда ҳам, Парижга келганингизда ўз характерингизга эга бўлишингиз билан бирга, жамоадаги ўйинчиларга мослашишингиз ҳам керак бўлади. Бу асло ғазабни келтирмайди, аксинча, ихтиёрингизда ўзига хос хусусиятларга эга футболчи борлигини ва ундан фойдаланиш мумкинлигини биласиз.
Шундай бўлса-да, сиз ўз ғояларингизни қайта кўриб чиқишингиз ва йигитларнинг ривожланишига имкон берадиган маълум бир тузилмани яратишга ҳаракат қилишингиз лозим», — деди Почеттино Гарри Невиллнинг Stick to Football подкастида.
Аргентиналик мутахассис «ПСЖ»да 2021 йилнинг январидан 2022 йилнинг июлига қадар фаолият юритган. Унинг қўл остида парижликлар Франция чемпиони, мамлакат Кубоги ва Суперкубоги соҳибига айланишган.
